و الله و لبسنا M

ما يبيلها كلام اكيد قبل

ما يبيلها كلام اكيد قبل

و بعد

و بعد

هذة اول تدوينة لي و حبيت تكون تعريف عن شخصيتي و تتكلم في موضوع يمكن يهم الكثير وهو الحمية

من تجربتي تنزيل الوزن ببطئ يساعد على المحافظة على الوزن اكثر

يعني اللي يروح بسرعه بيرجع بسرعه

علشان كذا خذت وقت للوصول للمقاس M 🙂

الحمية تنقسم لقسمين التغذية و الرياضة

نبداء بالتغذية :

جربت جميع انواع الحمية لكن عيبها مافيها تنويع او كلها مسلوق او نوع واحد

على طاري نوع واحد مرة سويت حمية الستيك طبعا طلع لي عضلات في وجهي من كثر ما اعلك في اللحم و ممكن يجيك شد عضلي في خدك مع الحماس 🙂 و من يومها و انا اكره الستيك

نعود للتغذية تجربتي مع الدايت سنتر ممتازة تنوع في الاكل و طعم ما تفرقة عن العادي الشي الوحيد اللي ممكن تلاحظة هو اول اسبوع بتحس بالجوع

اهم شي ما تغش يعني تخرج عن النص 🙂

الافضل بالنسبة لي اول الحمية تستمر معهم شهر كامل (اربعة اسابيع) ثم تترك الحمية و تاكل براحتك لمدة اسبوع ثم ترجع للحمية لمدة اسبوعين و تتركها اسبوع و هكذا

السبب؟ مما قرات و جربت ان الجسم اذا تعود على كمية سعرات حرارية تدخل يحاول يحرق نفس الكمية

يعني لم تطول على الحمية ماراح تنزل اكثر علشان كذا كثير يجيهم احباط بعد فترة لانهم ما يلاحظون نزول في الوزن

علشان كذا لازم تلعب على جسمك و تغير له البرمجه بحيث اسبوع الراحه يعمل حسابه على سعرات اكثر ثم ترجع به لسعرات الحميه وهو لا يزال يحرق اكثر و كذا تنزل اكثر

الرياضة:

مهمة لكن لا تجهد نفسك اكثر من اللازم و تذكر ان السعرات الحرارية اللي تدخل قليلة و كثرة الرياضة ممكن تسبب لك اجهاد

السباحة من افضل الرياضات بعدها المشي وحسب الاطباء اللي سالتهم الركض ممكن يسبب لك مشاكل في الركب اكثر خاصة ان اللي بيسوي حمية بيكون وزنة كبير و بيضغط على الركب

المفروض حتى الرياضة يكون لها ايام راحة على الاقل يومين بالاسبوع علشان تعطي فرصة للعضلة تنبني

ملاحظات عامة:

  • لا تحرص على الميزان ابدا المهم مقاس لبسك و شكلك
  • لا يهمك اللي يحطمون و طنش صدقني ما يحاول يحطمك الا اللي حاسدك 🙂
  • حاول ترتب جدولك على المناسبات علشان ما يصير في خاطرك شي من المفاطيح و البوفيهات 🙂
  • استمتع بكل مقاس ينقص و احرص على الصور
  • حاول تشتري ملابس اقل من مقاسك علشان تتحمس تلبسها

و اخيراً احب اشكر اخوي الصغير عمراً و الكبير مقاماً اللي ساعدني على فتح هالمدونة وهو اللي رتبها لاني من جنبها الا وهو الاستاذ رائد

عاد الحين جاء دوركم استلموني ملاحظات و اراء يعني قولو كل اللي بخاطركم بس بشويش علي اهم شي لا تخطفون عيني 🙂

87 تعليق على “و الله و لبسنا M

  1. ما شاء الله تبارك الله همة عالية، يعجبني الي يركز على الهدف ويحققه، عقبال ما تبلس S ولا هذه صعبة يعني بيطلع شكلك مو صح P:

    وعلى فكرة أول مرة أعرف أن عندك مدوّنة شيء جميل :).

  2. اعوذ عليك بكلمات الله التامات من شر ما خلق
    وش هالزين ؟!!
    الحلو زاد حلاوة ..
    رشاقه و ومدونه !! .. ما شاء الله

  3. ما شاء الله تبارك الله

    كـمل وإن شاء الله توصل للي تريده وتبغاه ..
    بـس كيـف وازنت بين المناسبات والحمـية .. .؟ P:

    أخـوك سمـين سابق

  4. بصراحه .. ما شاء الله عيني عليك بارده .. ادري هالموضوع يبي له اراده وصبر بس النتيجه ف النهايه حلوه والأهم الصحه .. عندي انسان عزيز جدا عجزت اقنعه ينحف جربت كل شي لحد ما يأست وكرهت نفسي وصرت امشي على خطواته ..

  5. ماشاء الله تبارك الله ، ألف مبروك =)

    شكرا جزيلا على مشاركتنا تجربتك .. نقطة اللعب عالجسم أول مرة أعرفها

    عالبركة المدونة و تدوين موفق

  6. ما شاء الله تبارك الله

    الحمد لله أنك نزلت هذا كله بصحة وعافية

    تصدق لما غيرت صورتك في تويتر حسيت ان وزنك نزل … بس خفت يكون احساس لا أكثر

    الله يقويك على كل طريق للخير

  7. السلام عليكم ورحمة الله ,,

    اغلب اللي يسوون ريجيم مايستمرون بس انت ماشاء الله عليك ,, انسان مثابر وصبوور..
    وبالنسبه لتعويد الجسم على نظام معين ,, سمعتها قبل بس ماقتعنت بها حسيتها تعذيب خخخ
    اسجل اعجابي بانجازك وعقبال ماتلبس الـ S 😉

    • بالنسبة لي الايروبك يتعبني لان فيني اصابه في القدم
      بس اشوف في النادي ما شاء الله خفو
      اهم شي التوافق بين الرجيم و الرياضة و عدم الارهاق و ترك ايام للاجازة
      بالتوفيق

  8. مشاءالله عليك ،،،،
    صراحه الصوره كلام ثاني خصوصا أني ماشفتك من زمان تصدق أول ما شفت الصوره أحسبها صوره سليمان وهو صغير ،،،
    بس نبي تفاصيل اكثر عن الدايت وكم نقص وزنك,,,,

    تحياتي أخوك أبو نوره.

  9. لا ماشاء الله فرق كبير بين قبل وبعد …

    حياك الله ماجد في عالم التدوين .. وبإذن الله تغطي ع أخوك رائد وصدقني اول تدوينه رائعة وان شاء الله كل اللي بعدها بيكون أروع …

    والصراحة احيي فيك اروحح الرياضية انك مااستسلمت للي يثبطون وفعلا قوة عزيم وإرادهــ اوصلتك للهدف ..

    تحياتي لك.. وأبارك لك المدونة الرائعة والأروع في المستقبل ان اء الله ولكن …

    أتمنى ان تستمر في التدوين ياعزيزي .. دمت بود ودمت مبدعا أيها النحيف .. P:

  10. مشاء الله تبارك الله يا ماجد

    اهنييك بكل مافيني على صمودك وصبرك على الرجيم اللي نفذته بكل حكمة وصبر وانا اشهد على ذلك بتقولي كيف ؟

    ياما جيت عندكم بالاستراحه وفرشو السفره وجابو الكبسه اللي تخلي الواحد يغمى عليه من لذتها وتطاير الرز فوق الرووس من الحماس

    وانت كنت في الزوايه لحالك وعينك في لابتوبك صامد يابطل .

    واصل يابطل 🙂

  11. كان وزني في بداية الثانوية 90 كنت سمين وقتها ، ثم عملت حمية قاسية جدا … نحفت لين وصل جسمي وزن 60 ! خلال 3 سنوات بالتدريج زدت إلى 70 و بعدها إلى 80 و كنت راضي شوية لأن شكلي و أنا 60 مو حلو أبد .. لكن الآن و أنا على قرب من التخرج من الجامعة (أي بعد 7 سنوات ) ارتفع وزني بالتدريج حتى وصل الآن 111 كيلو ! يعني ألعن من قبل … و البركة في سندوتشات بوفية الكلية و هارديز ..بيج تشامب و تشيلي لافا و البطاطس حقهم و الببسي الي قد برج العرب .. للأسف .. لكن ناوي أبدأ حمية رايقة و بطيئة على فترة طويلة ..

    مقهور من كرشي و من الصدامات الخلفية 🙁

    و مبروك يا معلم و عساك ما تنتكس ..

    • الله يبارك فيك
      الثبات مهم الله يثبتنا
      تشجع و حاول دائما تبعد عن الجنك فود و الشورما
      الدجاج عموما اعتقد هو مشكلة الاوزان الزايدة لان مربين الدواجن يكثرون لها محفزات و بالتالي تنتقل للي ياكلها
      الله يوفقك

  12. ما شاء الله تبارك الله ،،

    انصحك اخوي بقرائة مواضيع عنHigh Intensity Interval Training
    اختصارها HIIT نتايجها مضمونه بعد الله .. اسأل مجرب : )  

  13. أول شي مبروك عليك افتتاح المدونة 🙂
    تاني شي أحيييييييك بصراحة على عزيمتك واصرارك .. ما شاء الله الفرق واضح والجهد المبذول أوضح ^^
    شي حلو والله ونصايح جداً جميلة .. أهم شي تستمر بس ولا كان ودي أعزمك بهذه المناسبة على البيك بس مااااش ما يخارج :mrgreen:

  14. الف مبروك إن شاء الله الافتتاح

    وموضوعك جمل جدا ومفيد للناس الي في حالتنا

    فعلا معومات مفيدة ماشاء الله

    والموضوع مو طويل جدا ولاقصير جدا يعني وسط(خير الامور الوسط)

    وشكرا

  15. ماشاءالله..والله فرحت بمدونتك <لأنك انسان مميز بتويتر..واحييك على اصرارك <فرق حلو..بالتوفيق يارب متابعين للمدونه بإذن الله (:

  16. ما شاء الله بس لو انك على وضعك الاول ما كان احسن !! اقلها تصور في الفور سيزن :)) بيني وبينك الصورة الثانية لك عليها شكلها في الملحق 🙂

  17. ماشاء الله تبارك الله ..
    أخوي ماجد .. أهنئك على عزيمتك واصرارك ..
    أنا من زمان تقريباً قبل ٦ سنوات كان وزني ١١٦ كج .. وهذا كان يوم إني في الثانوي ..
    ثم نزل وزني تقريباً ٣٠ كج خلال سنة ونص .. والحمدلله كنت ثابت عليها لمدة تقريباً ٣ سنوات .. وألحين زاد وزني ١٠ كج .. وفي الطريق لإعادته إلى السابق ..

    تدوينتك هذه زادت من دافعيتي للمتابعة .. شكراً لك ..

  18. السلام عليكم .. أنا معجبه بك وأفتخر بك وبأمثالك .. والنعم بك وباخوالك خاصه ..
    أولا / أهنيك على إرادتك وثانيا / أشكرك على تقديم تجربتك المفيدة للآخرين وثالثا /اشكرك جدا جدا على إيميلاتك الرائعة حقا .. ولا تتخيل مقدار استمتاعي بها .. سؤالي هو : كم الوزن الذي فقدته وكم استغرق ذلك من الوقت ؟

    • و عليكم السلام
      شكرا على اولا و ثانيا و ثالثا 🙂 عسى الله ينفعبها ان شاء الله

      يمكن محد يصدق بس و الله للحين ما وزنت و لا عندي نية

      لان الوزن مو مهم بالنسبة لي الاهم الشكل بس تقريبا حسب تجربة سابقة حوالي 15 كيلو مع العلم اني ما انصح بمتابعه الميزان لانة بعض الاحيان يقلل عزيمتك

      ارجو ان اكون افدتك

  19. ماشاء الله ولاحول ولاقوه الابالله بصراحه باين الفرق والله يثبتك وان شاء الله للاقل

    وعقبالي ياارب وبخصوص حركه التنوع علشان الحرق بصراحه معلومه جديده

    وان شاء الله بتعامل مع الدايت سنتر واشوف الفرق بس سؤال بالنسبه للشاهي اللي يحرق

    لاني الحين بديت من اسبوع تقريبا شرب شاهي مكون من (شمر-يانسون-حبه سوده)بعد الاكل

    وحسيت سوائل كثيره تنقص مني مدري اذا هذا شي اجابي ولاسلبي ..
    واعتذر على الاطاله @_@

    • الله يجزاك خير
      و الله يوفقك
      بالنسبة للشاهي ما جربتة الصراحة
      و نقص السوائل مو دليل على نقص الوزن
      الاهم حرق الدهون
      بالتوفيق و خذ راحتك بالاطالة
      تحياتي
      🙂

  20. السلام عليكم صراحة تجربتك حمستني أكثر أكثر .. و كل النصائح اللي اعطيتها صحيحة و مفيدة و أهم شيء الواحد لا يستعجل على نزول الوزن و ضروري الواحد يخلي الأكل الصجي و الرياضة أسلوب حياة مو شيء مؤقت هذا أكبر خطأ يقع فيه الكثيرين و أولهم كنت أنا

    أنا اعاني من السمنة من الطفولة و دائماً كانت عندي محاولات جاده و كنت أنزل وزن لكني كنت ارجع انتكس لأني كنت معتبره هالأمر مؤقت و بيجي يوم برتاح من الحمية و الرياضة و كنت أضغط على نفسي بشدة .. لكن بعد ما تخرجت من الجامعة صار عندي وقت فراغ كبير و عقدت العزم أن انزل وزني قبل لا أبدا أدور وظيفة أو أكمل دراسات عليا صار نزول الوزن هو الهدف الوحيد لي و لله الحمد الحين لي 11 شهر نقصت فيها 26 كيلو كان وزني 122 كيلو والآن 95 كيلو .. خلصت نصف المهمة و باقي لي نصف صحيح اني الحين أمر بمرحلة ثبات لكني صابرة و عاقده العزم اني اكمل بإذن الله .. لأني اللي يذوق النحف تتغير حياته على جميع الأصعدة و السر اللي خلاني هالمرة انجح هو الدعاء و اني ادخلت الأكل الصحي و الرياضة في حياتي صارت شيء أساسي و فوق كذا مو حارمه نفسي أروح بين فتره و الثانية مطاعم و عزومات و الحمدلله الكل لاحظ التغيير

    و على فكره أنا جربت جميع مراكز الحمية و الحين استقريت على عالم الحمية .. أكلهم طعمه لذيذ و المنيو متنوع و فوق كذا ينحف

    أول مره أحكي تجربتي بس شفت إقبال الناس على تجربتك قلت خليني أحكيها لعل أحد يستفيد

    شكراً أخ ماجد

    ايه وبذكر قياسات الملابس أنا كنت ألبس 26 و الحين صرت ألبس 18 أو 20

  21. اهنيك اخوي واتمنى لك المواصله
    لكن عندي موضوع مورقني اللي هو الصدر كيف اقدر انحفه؟ اغلب اللي نحفوا وانت مثال ما زال عندهم ترهل بهالمنطقه

    انا منب سمين جدا لكن مشكلتي هو ان في اللبس مايضايقني غير هالمكان فاضطر اشتري سايز اكبر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *